«Bainvegni da cuore à Coire in Graubünden!»
Qua vai a l’annunzia online
Qua chattais Vus las novitads las pli impurtantas da la Festa federala da tir.
Durant in mais, dals 5 da zercladur fin ils 5 da fanadur 2026, avain nus dastgà beneventar en il Grischun radund 35’000 tiraduras e tiradurs da tut las regiuns da noss pajais. Ensemen avain nus passentà ina festa ch’è stada bler dapli ch’ina concurrenza sportiva. Igl è stà ina festa d’inscunter, d’amicizia e da coesiun.
Noss motto «tradiziun e passiun» avain nus vivì durant questas emnas. Sin ils stans da tir, en il center da festa ed en ils numerus inscunters persunals avain nus vivì mintga di la cumpagnia, la fairness ed il respect. Gist questas valurs caracteriseschan il sport da tir svizzer dapi generaziuns e rendan el unic.
En num da l’entir comité d’organisaziun engraziain nus cordialmain a tut las tiraduras ed a tut ils tiradurs per lur visita, per lur disciplina e per lur attaschadadad a noss sport. Vus avais transfurmà la Festa federala da tir 2026 en in eveniment nunemblidaivel.
Medemamain vulain nus engraziar a noss:as partenari:as e sponsur:as, a las autoritads da la Confederaziun, dal Chantun e da las vischnancas, a la Federaziun svizra dal sport da tir, a las federaziuns da tiraduras e tiradurs grischunas, a las organisaziuns da l’armada e da segirezza, als servetschs da salvament, a las medias sco er a las numerusas interpresas ed instituziuns che han gidà e sustegnì nossa festa.
Da cor engraziain nus er a las uniuns da tir sin tut ils stans da tir ordaifer, a las ustarias, a noss voluntaris, a las gidantras ed als gidanters voluntaris sco er a las nundumbraivlas persunas ch’han lavurà durant mais ed onns cun grond engaschi per questa Festa federala da tir. Senza
ellas ed els na fiss in’occurrenza da tala dimensiun betg stada pussaivla. A questas persunas tutga noss pli grond engraziament.
Engraziar spezialmain vulain nus er a la populaziun grischuna. Ella ha purtà la Festa federala da tir cun gronda avertadad, pazienza ed ospitalitad ed ha contribuì essenzialmain che noss giasts han pudì sa sentir bainvegnids e bainvis en il Grischun.
Durant in mais ha il Grischun dastgà sa preschentar sco lieu d’occurrenza ospitaivel. Nus sperain che las tiraduras ed ils tiradurs prendan a chasa bleras bellas regurdientschas e sa regordan gugent dals inscunters, da las cuntradas impressiunantas e da l’ospitalitad grischuna cordiala. Il Grischun ha dastgà esser ospitant da l’entira Svizra. Per quai essan nus engraziaivels ed er in zic loschs.
A las novas campiunessas-tiraduras ed als novs campiuns-tiradurs gratulain nus cordialmain per lur prestaziuns excellentas. Vus represchentais l’auta qualitad dal sport da tir svizzer.
Cun il di dad oz va a fin la Festa federala da tir 2026. Quai che resta èn regurdientschas, novas amicizias e nundumbraivlas experientschas communablas che tanschan lunsch sur questa occurrenza ora.
En num da l’entir comité d’organisaziun engraziain nus a tuttas e tuts che han pussibilità questa grondiusa festa. Nus vegnin a tegnair en memoria la Festa federala da tir 2026 sco eveniment unic e sperain da cor ch’era Vus n’emblidias mai il Grischun e tegnias en buna memoria noss chantun.
En quest senn hai num per la FFT2026: Chalar da sajettar!
A revair en il Grischun – e vinavant «Bun tir!»
Per il comité directiv da la Festa federala da tir 2026 Cuira | Grischun
Martin Candinas, OK-Präsident
Carl Frischknecht, Generalsekretär
Peter Bänziger, Chef Infrastruktur
Lucas Caduff, Chef Anlässe
Esther Hug, Chefin Personal
Urs Marti, Chef Schiessplatz Chur
André Renggli, Chef Finanzen & Marketing
Hubert Tomaschett, Chef Schiessen
Grazia fitg. Herzlichen Dank. Merci beaucoup. Grazie mille.
Ina da las pli grondas occurrenzas da sport svizras il 2026 ha lieu en la chapitala grischuna ed en ulteriuras regiuns! Sco stan da sajettar principal e center da la festa serva l’implant da tir sin il Rossboden a Cuira. Plinavant vegnan integrads en las festivitads ed il manaschi da tir 20 fin 25 ulteriurs implants da tir en differentas regiuns grischunas.
L’organisaziun decentrala ed uschia persistenta da la FFT2026 ha l’avantatg ch’i n’è probablamain betg necessari da prender a fit schibas temporaras u da construir edifizis supplementars. L’uniun FFT2026 indemnisescha la participaziun e l’engaschi da las societads purtadras, da funcziunarias e funcziunaris e voluntarias e voluntaris. Questas indemnisaziuns pon lura vegnir duvradas cumplettamain u parzialmain per renovar ils implants da tir existents, quai che vegn dabun a las societads da tir regiunalas. Uschia vegn garantì in ulteriur diever raschunaivel dals implants da tir.
L’occurrenza gronda survegn preschientscha naziunala. Vulais Vus survegnir sco sponsur ina plattafurma cun Voss logo da fatschenta u profitar d’autras cuntraprestaziuns? Vulais Vus esser da la partida sco donatura u donatur en la tenda da premis? As infurmai en il dossier da sponsurs davart las differentas pussaivladads.
Sche Vus avais interess u dumondas As drizzai p.pl. a:
cusseglier naziunal Martin Candinas,
president dal comité d’organisaziun, Martin.Candinas@gr2026.ch
finanzas/marketing Andre.Renggli@gr2026.ch
manader dal ressort sponsuradi, Daniel.Soler@gr2026.ch
Retus Buchli,
manader dal resort premis, Retus.Buchli@gr2026.ch
secretari general, Carl.Frischknecht@gr2026.ch
Nus faschain quint cun var 36’000 tiraduras e tiradurs e circa 100’000 visitadras e visitaders da la festa. Mo grazia a numerusas uras da lavur voluntara èsi insumma pussaivel da realisar in’occurrenza da tala grondezza. Nizzegia la schanza dad esser al puls da la FFT2026 cun t’engaschar en differents secturs avant, durant u suenter l’occurrenza.
T’annunzia anc oz per in dals numerus champs d’acziun sin la plattafurma Swiss Volunteers.
Noss dis da tir uffizials èn: da venderdi, ils 5 da zercladur 2026 fin dumengia, ils 5 da fanadur 2026.
Vus vulais as engaschar sco uniun u sco gruppa?
As annunziai via personal@gr2026.ch per survegnir ulteriuras infurmaziuns.
Il comité d’organisaziun motivà cun ses president Martin Candinas sa legra gia oz sin ina Festa federala da tir 2026 Cuira I Grischun interessanta e nunemblidaivla che vegn purtada da colleghialitad.
Bainvegni en il Grischun! En il pli grond chantun da la Svizra pudais Vus scuvrir tranter muntognas magnificas e valladas idillicas in paradis da vacanzas unic. Vus spetgan eveniments multifars per gruppas, famiglias e sa chapescha per tut las persunas che participeschan a la FFT2026.
Scuvri nossas purschidas concepidas aposta per tiraduras, tiradurs e lur persunas d’accumpagnament: saja quai hotels confortabels u activitads dal temp liber plain tensiun, qua chattais Vus las meglras recumandaziuns e colliaziuns.
Il chantun Grischun offra purschidas da pernottar per mintga gust e mintga bursa – da hotels simpels fin a hotels luxurius da tschintg stailas. Reservai Voss alloschi a moda cumadaivla via las paginas-web da noss hotels partenaris ubain da las destinaziuns respectivas e profitai da pretschs attractivs e pli grondas disponibilitads.
A la FFT2026 datti in program accumpagnant variant cun activitads multifaras e daletgs gastronomics. Scuvri gia oz las offertas da las differentas destinaziuns ed As laschai inspirar.
Datas dal conto
Verein Eidgenössisches Schützenfest 2026
7000 Chur
IBAN: CH61 0077 4010 4262 3380 0
ulteriurs sponsurs da partenaris, sponsurs da la festa e sponsurs da serias
