L’annunzia per la Festa federala da tir 2026 succeda analog a l’annunzia per las festas da tir chantunalas 2025 SG, FR, ZH e BE-JU. Per l’access al portal d’annunzia ston ins avair in login per SAT-Admin ed ina rolla adattada en l’atgna uniun. Plinavant vegn averta a partir dal 1. da december 2025 per duas emnas ina fanestra, nua che las persunas responsablas per las uniuns pon preregistrar las participantas ed ils participants, las serias e las gruppas. A partir dals 15 da december vegnan avertas en etappas las singulas disciplinas. Cura ch’ellas èn avertas, pon ins tscherner ils rangaders e terminar l’empustaziun. I n’è betg pussaivel da prereservar rangaders. Quels pon ins reservar mo cun in’empustaziun da serias respectiva.
Per las participantas ed ils participants è la pli gronda novaziun ch’i na dat betg pli in cudeschet da tir stampà e che tut las infurmaziuns èn avant maun electronicamain. Suenter l’annunzia online ed il pajament dal quint vegn creada sco usità in’identificaziun da la participanta u dal participant («T-Ident»). La T-Ident è ina carta pratica che vegn furnida sin palpiri da support. Sin il palpiri vegnan enumeradas detagliadamain las serias pajadas. La T-Ident vegn tramessa a l’uniun da tir.
La software da la Indoor Swiss Shooting AG sa basa sin ina lavur da svilup da var 15 onns e sin l’experientscha da 30 onns en la realisaziun da festas da tir. Il davos è ella vegnida duvrada e vegn ella duvrada a chaschun da las quatter festas da tir da l’onn 2025 (SG, FR, ZH, BE-JU). Sco consequenza dals svilups dals ultims onns exista gia oz in schumellin digital da mintga cudeschet da tir cun bunamain tut las infurmaziuns dal cudeschet. Fin uss è dentant anc adina il cudeschet stà «l’ultima vardad», da nov vegnan quai ad esser las datas en il sistem.
Da vart da la contabilitad da tir vegn vitiers da nov pia «mo» la colliaziun extendida cun SIUS SA 9006 / SIUS SR24, las pussaivladads digitalas da far correcturas, las novas pussaivladads da leger la T-Ident sco era la controlla da las armas documentada digitalmain. Natiralmain datti er adattaziuns en connex cun l’endataziun dals resultats cun agid da tablets en las disciplinas da pistola cumprovada dapi passa 10 onns.
En il stan da sajettar s’annunzia ina participanta u in participant adina tar l’operatura u l’operatur da ses sectur da nodas. L’operatura u l’operatur administrescha a moda centrala l’occupaziun da las nodas e fa las manipulaziuns necessarias vi dal sistem. Sch’ina tiradura u in tiradur è attribuì ad ina noda, cumparan sin ses monitur tut las serias tscherniblas. L’andament detaglià en il stan da sajettar vegn communitgà la fin da l’atun 2025. En ils stans da sajettar vegni a dar plirs «troubleshooters» che pon sustegnair las participantas ed ils participants en cas da basegn.
En connex cun il quint final en il center da festa na sa mida nagut visavi las festas da tir chantunalas 2025 da la Indoor Swiss Shooting AG. I vegn damai vinavant a dar spurtegls da correctura e da controlla, nua che vegnan consegnadas las quittanzas cun tut ils resultats ed ils bons per distincziuns e sbursaments.
Ensemen cun la SIUS AG essan nus persvas da pudair meglierar a maun dals novs andaments il manaschi da tir en ils stans da sajettar e preschentar las infurmaziuns per las participantas ed ils participants a moda pli transparenta. Las novaziuns distgargian l’organisatur en la tschertga da persunal e portan a las uniuns realisaturas installaziuns per l’indicaziun dal culp topmodernas per ils proxims onns. Cun il cudeschet da tir digital pudain nus far in ulteriur pass en l’avegnir tegnend quint da la persistenza en blers reguards.